काठमाडौँ। काठमाडौँ महानगरपालिकाकी उपमेयर सुनिता डंगोलले सडक व्यापार व्यवस्थापन गर्ने काम महानगरको मात्रै नभएको बताएकी छिन्। सोमबार काठमाडौँमा आयोजित पत्रकार भेटघाट कार्यक्रममा उपमेयर डंगोलले यस्तो बताएकी हुन्।
‘हाम्रो प्रमुख चुनौती भनेको सडक व्यापार व्यवस्थापनको कुरा नै हो। यो समस्या काठमाडौँ महानगरको मात्रै पक्कै होइन। देशभरिमा जहाँजहाँ शहर छ, त्यहाँ सडक व्यापार व्यवस्थापनको समस्या छ,’ उपमेयर डंगोलले भनिन्, ‘यो केन्द्रीय सरकारले विशेष महत्त्वका साथ हेर्नुपर्ने विषय पनि हो। यस विषयमा राज्यको हिसाबले केन्द्र तहबाट नै नीति, नियम बनाइयोस्।’
उनले यो समस्याको दिगो समाधान हुने गरी तत्काल एकीकृत नीति बनाउन सङ्घीय सरकारलाई आग्रहसमेत गरिन्। यो समस्या समाधानका लागि काठमाडौँ महानगरलाई दबाब दिने काम नगर्न पनि उनले अनुरोध गरिन्।
महानगरपालिका आफ्नो नीति र कार्यक्रमअनुसार अघि बढिरहेको उनको भनाई छ।
