सुन तस्करी प्रकरणमा ५० जना संलग्न, अझै १८ जना फरार

काठमाडौँ। त्रिभुवन अन्तर्राष्ट्रिय विमानस्थल भन्सारबाट ‘ब्रेक शु’को स्वरुपमा भित्रिएको ६० किलो सुन तस्करी प्रकरणमा ५० जना संलग्न रहेको प्रहरीको केन्द्रीय अनुसन्धान ब्यूरोले जनाएको छ । ब्यूरोको अनुसार २३ विदेशीसहित ५० जना संग्लन्न रहेका छन्।

सुन तस्करीहरुले हङकङबाट नेपाल हुँदै भारतसम्म लगेर सुन बिक्री वितरण गर्ने गरेको अनुसन्धानमा खुलेको सीआईबीले जनाएको छ। सीआईबीले २७ नेपाली र २३ विदेशी नागरिकलाई प्रतिवदी बनाउन रायसहित आजै सरकारी वकिलको कार्यालयलाई अनुसन्धान प्रतिवेदन बुझाउने तयारी गरेको छ।

यस प्रकरणमा हालसम्म ३२ जना पक्राउ परेका छन् भने १८ जना फरार छन्। फरारमध्ये १४ विदेशी र चार नेपाली हुन्।

तस्करहरुले ७ वटा नेपाली कम्पनी खोलेर त्यसैमार्फत कारोबार गरेको पनि खुलेको छ। ७ मध्ये ६ ओटा कम्पनीबाट भित्राइउको सामानमा कुनै न कुनै रुपमा सुन ल्याइएको देखिएको प्रहरीको भनाई छ। एउटा कम्पनीबाट भने सामान भित्राएको नदेखिएको र त्यसमार्फत पनि भित्राउने तयारी भईरहादा व्रेक लागेको हुनसक्ने सीआइबीले जनाएको छ।

साउन ४ गते सिनामंगलबाट ब्रेक शुमा लुकाएर ल्याएको अवैध सुन राजस्व अनुसन्धान विभागले बरामद गरेको थियो।