प्रतिबद्धता पूरा नगरे भदौ २९ गतेदेखि सत्याग्रह गर्ने डा. गोविन्द केसीको घोषणा

काठमाडौँ। चिकित्सा शिक्षा सुधारका अभियन्ता डा. गोविन्द केसीले सरकारले आफूसँग प्रतिबद्धता पूरा नगरे भदौ गतेबाट सत्याग्रह सुरु गर्ने घोषणा गरेका छन्। सोमबार एक विज्ञप्ति जारी गर्दै केसीले भदौ २९ गतेदेखि सत्याग्रह सुरु गर्ने घोषणा गरेका हुन्।

‘हामीले विभिन्न मागहरू राखेर यही साउन २९ गतेबाट सत्याग्रह सुरु गर्न लागेकोमा सरकारका तर्फबाट विभिन्न प्रतिबद्धताहरू आएपछि एक महिनाका लागि सत्याग्रह पछि सारेका थियौँ,’ विज्ञप्तीमा भनिएको छ, ‘ती प्रतिबद्धताहरू कार्यान्वयन नभए यही भदौ २९ गतेबाट सत्याग्रह सुरु गर्ने जानकारी पनि गराउँछौँ।’

उनले चिकित्सा शिक्षा आयोगको उपाध्यक्षमा डा. अञ्जनीकुमार झाको नियुक्तिप्रति असन्तुष्टि जनाएका छन्। सरकारले आयोगमा निवर्तमान उपाध्यक्ष डा. श्रीकृष्ण गिरीलाई पुनः नियुक्ति नदिएर दण्डित गरेको भन्दै केसीले यसले चिकित्सा शिक्षा सुधारमा असर पर्ने बताएका हुन्।