काठमाडौँ। नक्कली भुटानी शरणार्थी प्रकरणमा मुछिएकाहरुको मुद्दामा उच्च अदालत पाटनमा आज सुनुवाई हुने भएको छ। आफूहरुलाई थुनामा राख्ने आदेश गलत भएको भन्दै दिएको रिटमा सुनुवाई हुने भएको हो।
न्यायाधीसद्वय सुभाष पौडेल र दीपेन्द्र अधिकारीको संयुक्त इजालसमा यो मुद्दा आज पेशीमा चढेको छ।
जिल्ला अदालत काठमाडौँको आदेश बदर गरी आफूहरुलाई सामान्य तारिखमा रिहा गर्नुपर्ने भन्दै कांग्रेस नेता एवं पूर्वगृहमन्त्री बालकृष्ण खाँण, एमालेका निलिम्बत सचिव एवं पूर्वउपप्रधानमन्त्री टोपबहादुर रायमाझीलगायत २० जना उच्च अदालत पुगेका हुन्।
थुनामा रहेकाहरु अलग अलग रुपमा निर्णय सच्चाई तारिखमा रिहा गर्न माग गदै उच्च अदालत पाटन पुगेपछि उच्च अदालत पाटनले निलम्बित सचिव टेकनारायण पाण्डेसहितको निवेदनमा सुनुवाइ गर्दै यो प्रकरणसँग जोडिएका सबै मुद्दा एकै ठाउँमा राखेर सुनुवाइ गर्ने साउन ३२ मा आदेश दिएको थियो। त्यसवेला न्यायाधीशद्वय हरिप्रसाद पौडेल र किरणकुमार पोखरेलको इजलासमा पेसी रहेको मुद्दामा कानुन व्यवसायीले बहस गरेपछि यस्तो आदेश दिएका थिए।
त्यसपछि उच्च अदालत पाटन पुगेका यो प्रकरणमा थुनामा रहेका २० जनाको मुद्दा नै एकै ठाँउमा राखेर सुनुवाई हुन लागेको हो।
