एमसीसीका उपाध्यक्ष काठमाडौँ आउँदै

काठमाडौँ। अमेरिकी मिलेनियम च्यालेन्ज कर्पोरेसन (एमसीसी)का उपाध्यक्ष क्यामरन अलफोर्ड काठमाडौँ आउने भएका छन्। नेपालको तीनदिने भ्रमणका लागि उनी आज मंगलबार काठमाडौँ आउन लागेका हुन्।

एमसीसीको ५० करोड अमेरिकी डलर सहयोगमा नेपालमा सञ्चालन हुने आयोजनाको बुधबारदेखि औपचारिक रूपमा कार्यान्वयन सुरु गरिँदै छ। सोही कार्यक्रममा सहभागी हुन उनी नेपाल आउन लागेका हुन्।

नेपाल र एमसीसीबीच २०७४ भदौ २९ गते सम्झौता भएको थियो। एमसीसीले नेपालका सडकको मर्मतसम्भार, सुधार र विद्युत् प्रसारणलाइनको विकासमा ५० करोड अमेरिकी डलर उपलब्ध गराउने सम्झौतापत्रमा उल्लेख छ।

सम्झौताअनुसार ती आयोजना सम्पन्न गर्न नेपाल सरकारले १३ करोड अमेरिकी डलर लगानी गर्नुपर्ने हुन्छ।