वीरगञ्ज। उपप्रधानमन्त्री तथा गृहमन्त्री नारायणकाजी श्रेष्ठले सुशासनको अभियानबाट सरकार कुनै पनि हालतमा पछि नहट्ने बताएका छन्। नेकपा माओवादी केन्द्र पर्साद्वारा आज आयोजित प्रशिक्षण तथा पार्टी प्रवेश कार्यक्रममा उनले यस्तो बताएका हुन्।
जस्तोसुकै चुनौतीको सामना गरी सरकारले सुरु गरेको सुशासनको अभियानलाई निष्कर्षमा पुर्याई छाड्ने दृढता व्यक्त गरे।
‘सरकारले भ्रष्टाचार, अनियमितता र तस्करीका ठूला ठूला फाइलहरू खोलेर अनुसन्धान सुरु गर्दा भ्रष्ट, ठग र तस्करहरू सरकारको सुशासन अभियानलाई असफल बनाउन सक्रिय बनेर लागेका छन्,’ गृहमन्त्री श्रेष्ठले भने, ‘तर, सरकार कसैको धम्की, घुर्की र अवरोध गर्दैमा रोकिनेवाला छैन, जसरी पनि अगाडि बढ्छ।’
सरकारले भ्रष्टाचारका फाइलहरूको छानबिन गरी निष्कर्षमा पुर्याएर दोषीलाई कानुनी दायरामा ल्याइछाड्ने उनले बताए।
