सन्दीपविरुद्धको मुद्दामा किशोरीकी आमाको उमेर एकिन गर्न आदेश

काठमाडौँ। जिल्ला अदालत काठमाडौँले सन्दीप लामिछानेविरुद्धको बलात्कार मुद्दामा जाहेरी दिने किशोरीकी आमाको उमेर एकिन गर्न आदेश दिएको छ।

बिहीबार न्यायाधीश राजुकुमार खतिवडाको इजलासले आमाका जन्ममिति प्रमाणीकरणपछि मात्र मुद्दाको बाँकी काम अघि बढ्ने आदेश सुनाएको हो। किशोरीकी आमाको उमेर २०५३ साल भएको पाइएपछि एकिन गर्न आदेश दिएको हो।त्यही विवरणका कारण पीडित भनिएकी किशोरी उनकी आमा ९ वर्षकी हुँदै जन्मिएको देखिन्छ।

विवरण नमिलेको देखिँदा आमाको उमेर एकिन गर्न न्यायाधीश खतिवडाले आदेश दिएका सन्दीपका वकिल मुरारी सापकोटाले जानकारी दिए। उता किशोरीको उमेर भने घटना हुँदाको समयमा नाबालिग नरहेको, १८ वर्ष पूरा भएको विवरण नारायणी अस्पतालले अदालतलाई पठाएको छ। यो प्रकरणमा ती किशोरीले अदालतको आदेशअनुसार राज्यले पीडित राहत कोषबाट दिने एक लाख रुपैयाँ बुझेर लगिसकेकी छन्।