काठमाडौँ। नेकपा एकीकृत समाजवादीका अध्यक्ष माधवकुमार नेपालले बालुवाटार जग्गा प्रकरणमा आफ्नो कुनै गलत नियत नभएको दाबी गरेको छन्। भ्रमणका लागि स्वीजरल्याण्ड पुगेका पूर्वप्रधानमन्त्री समेत रहेका अध्यक्ष नेपालले बालुवाटार जग्गा प्रकरणमा आफ्नो नियत गलत नभएको दाबी गरेका हुन्।
अध्यक्ष नेपालले आफूले गरेको काम असल नियतका साथ भएको दाबी गर्दै ‘नबिराउन नडराउनु’ भन्ने मान्यतामा आफू अडिक रहेको उल्लेख गरेका हुन्।
स्वीजरल्याण्डको जेनेभाबाट अध्यक्ष नेपालले भने, ‘एउटा भनाइ छ, नबिराउन नडराउनु। मैंले कुनै बिराएको छैन। बद्मासी गरेको छैन। भ्रष्टाचार गरेको छैन। अत्यन्त असल मनसायले मात्रै बालुवाटार विस्तारको पक्षमा निर्णय गरेको हुँ। कुनै पनि किसिमको अनुचित काम मैले गरेको छैन। त्यसैले कसैलाई पनि उन्मुक्ति दिने होइन, छानबिन गर्नुपर्छ। बद्मासी गरेको छ भने दण्डित गर्नुपर्छ। मैंले गरेको छै भन्ने मलाई पुरै विश्वास छ। राष्ट्रको विरुद्धमा भ्रष्टाचारको पक्षमा मुछिने कुनै पनि काम मैंले गरेको छैन। त्यसैले अदालतको निर्णयबारे भन्नुपर्ने छैन।’
आइतबार सर्वोच्च अदालले माधवकुमार नेपाल र बाबुराम भट्टराई प्रधानमन्त्री भएका बेला क्याबिनेटले गरेका चारवटा निर्णयमाथि छानबिन गर्न आदेश दिएको छ। सर्वोच्चले उच्च तहका पदाधिकारीलाई समेत छानबिनमा ल्याउन आदेश दिएसँगै पूर्वप्रधानमन्त्रीहरु नेपाल र बाबुराम भट्टराईमाथि पनि छानबिन गर्नुपर्ने बाध्यता भएको छ।
