काठमाडौँ। प्रमुख प्रतिपक्ष दल नेकपा एमालेले निरन्तर अवरुद्ध गर्दै आएको प्रतिनिधिसभा बैठक आजदेखि खुलेको छ।
करिब एक क्वीन्टल सुन तस्करी प्रकरणमा सरकारको तर्फबाट उपप्रधान तथा गृहमन्त्रीले जवाफ दिने प्रतिबद्धतापछि एमाले तत्कालका लागि सदन खुलाउन तयार भएको हो। बालुवाटारमा आज बिहान सभामुखसहित बसेको शीर्ष नेताको बैठकमा एमाले शर्तसहित सदन खुलाउन तयार भएको थियो।
उपप्रधान तथा गृहममन्त्री नारायणकाजी श्रेष्ठले सुन तस्करी प्रकरणमा उठेका सवालको जवाफ दिने भएपछि एमाले तत्कालका लागि बैठक चल्न दिन सहमत भएको हो।
मंगलबार बालुवाटारमा भएको तीन दलको शीर्ष नेताहरूको बैठक आज सदन चल्न दिने सहमति भएको हो। आजको बैठकमा गृहमन्त्रीले जवाफ दिने र नेताहरूले पनि आफ्नो कुरा राख्दैछन्।
बैठकमा प्रधानमन्त्री प्रचण्डसहित सभामुख देवराज घिमिरे, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली सहभागी थिए।
