विराटनगर। रोहित चौधरी हत्या प्रकरणमा संलग्न भएको आरोपमा थप दुई जना पक्राउ परेका छन्। विराटनगर महानगरपालिका ५ का रोहित चौधरी हत्यामा संलग्न भएको आरोपमा प्रहरीले थप दुई जनालाई पक्राउ गरेको हो।
जिल्ला प्रहरी कार्यालय सुनसरीका प्रमुख प्रहरी उपरीक्षक प्रभु ढकालका अनुसार हत्याको अनुसन्धानका क्रममा बिहीबार धरान र विराटनगरबाट एक–एक जना पक्राउ परेका हुन्। पक्राउ परेका मध्ये एक जना हत्यामा संलग्न व्यक्ती हुन्। अर्का भने हतियार दिने व्यक्ती हुन्।
प्रहरी उपरीक्षक ढकालले पक्राउ पर्नेमा धरानका प्रकाश लिम्बू र विराटनगरका अज्जु भनिने अजय शर्मा रहेको जानकारी दिए। शर्माले हतियार उपलब्ध गराएको प्रहरीको प्रारम्भिक अनुसन्धानमा देखिएको उनले बताए। चौधरी हत्याकाण्डमा प्रहरीले बुधबार नाईके भनिएका लेटाङ नगरपालिका– १ का दीपक तिम्सिना र धरान १४ का अनसन तामांगलाई पक्राउ गरेको थियो।
थप अनुसन्धानका क्रममा करिब २२ वर्षीय लिम्बूलाई धरान र करिब ३० वर्षका शर्मालाई विराटनगरबाट पक्राउ गरिएको ढकालले जानकारी दिए। उनका अनुसार घटनामा तिम्सिनालगायतको समूहलाई शर्माले हतियार उपलब्ध गराएका हुन्। घटनामा तीन जनाको संलग्न रहेको प्रारम्भिक अनुसन्धानमा खुलेसंगै हत्याप्रकरणमा जोडिएका अन्यको पक्राउमा प्रहरी खटिएको छ।
गत साउन ५ गते २८ औं जन्मदिन मनाउन विराटनगरबाट भेडेटार, मुलघाटहुँदै विराटनगरस्थित घर फर्कने क्रममा धरानको सेउती पुलनजिक चौधरीमाथि लुटेराहरुले आक्रमण गरेका थिए। बाइक रोकेर बसेको अवस्थामा लुटेराहरुले युवतीले लगाएको सिक्री मोबाइल र पैसा लुटेका थिए। त्यसक्रममा चौधरीले प्रतिकार गरेका थिए। प्रतिकार गर्दा मुख्य नाइके तिम्सिनाले गोली प्रहार गरेको प्रहरीले जनाएको छ। गोली लागेर घाइते भएका चौधरीको उपचारका क्रममा धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको थियो।
