काठमाडौँ। सर्वोच्च अदालतले कोशी प्रदेशमा ७ दिनभित्र नयाँ सरकार गठन गरिसक्न आदेश दिएको छ। न्यायाधीशहरु ईश्वरप्रसाद खतिवडा, आनन्दमोहन भट्टराई र तिलप्रसाद श्रेष्ठको पूर्ण इजलासले बिहीबार यस्तो आदेश दिएको हो।
सर्वोच्चले असार २१ मुख्यमन्त्री बनेका उद्धव थापाको नियुक्ति बदर गरेसँगै फेरि एक पटक संविधानको धारा १६८ (२) अनुसार सात दिनभित्र नयाँ सरकार बनाइसक्न आदेश दिएको हो। यो संवैधानिक व्यवस्थाअनुसार दुई वा दुईभन्दा धेरै दलले फेरि एक पटक बहुमत जुटाएर सरकार बनाउने प्रयास गर्नेछन्।
यसअघि थापालाई मुख्यमन्त्री नियुक्तिविरुद्ध एमालेले असार २२ गते रिट हाल्दा उत्प्रेषणको आदेशद्वारा धारा १६८ (३) अनुसार नयाँ सरकारको बाटो खोल्न परमादेश माग गरेको थियो।
यदि उपाधारा २ अनुसार सरकार बनाउन फेरि पनि सम्भव नभए उपधारा ३ अनुसार प्रदेशसभाको सबैभन्दा ठूलो दल एमालेले सरकार बनाउने छ। अबको सात दिनमा उपाधारा २ बाट सरकार बनाउन नसकेमा त्यसपछि एमाले संसदीय दलका नेता हिक्मत कार्कीलाई मुख्यमन्त्री बन्ने बाटो खुल्नेछ।
सर्वोच्चको यो आदेशपछि अहिलेका मुख्यमन्त्री थापा कामचलाउमा परिणत भएका छन्।
