काठमाडौँ। पत्रकार एवं साहित्यकार विमल नेपालको उपन्यास ‘पीपला’ सार्वजनिक गरिएको छ । शनिबार प्रज्ञा प्रतिष्ठानमा एक कार्यक्रम गर्दै उपन्यास सार्वजनिक गरिएको हो ।
कार्यक्रममा समीक्षक ज्ञानु अधिकारीले ग्रामीण क्षेत्रको जीवनशैली, माओवादी सशस्त्र युद्धकालीन परिवेश र त्यसले पारेको प्रभाव उपन्यासमा समेटिएको बताइन्।
अधिकारीले ‘पीपला’को कथा २० वर्षअघिको भए पनि अहिलेको समयमा अति नै सान्दर्भिक रहेको बताइन्। ‘अहिलेको परिवेश पनि उत्तिकै सान्दर्भिक छ।
उपन्यासमा पाठकले आफूले बाँचेर आएको समयलाई भेटाउँछन्। उपन्यास पढ्दा पाठक आफैँलाई आफू भएको अनुभूति गराउँछ। हामी सबैले बाँचेको जीवन छ। हामी सबैले अनुभव गरेर आएको समयको कथा हो,’ उनले भनिन्।
कार्यक्रममा समीक्षक राजकुमार बानियाँ र उपन्यासकार नयनराज पाण्डले पुस्तकबारे टिप्पणी गर्दै लेखकलाई शुभकामना दिएका थिए। लेखक नेपालले आफूले भोगेको परिवेशलाई नियालेर पीपला तयार गरेको बताए।
कलिलै उमेरमा सशस्त्र संघर्षमा होमिएकी ‘पीपला’ नामक पात्रले युद्धका दौरान र शान्ति प्रक्रियापछि समाजमा पुनस्थापित हुन गर्नुपरेका संघर्षलाई उपन्यासमा प्रस्तुत गरिएको छ।
