एजेन्सी । तिब्बतका आध्यात्मिक नेता दलाई लामाले तिब्बतको समस्या समाधान गर्न चीनले आफूसँग सम्पर्क गर्न चाहेको र त्यसका लागि आफू तयार रहेको बताएका छन् ।
यो वार्ता आधिकारिक होस् वा अनौपचारिक, जसरी भए पनि उनीहरु त्यसका लागि तयार रहेको उनले बताए ।
दिल्ली र लद्दाखको भ्रमणमा जानुअघि हिमाचलको कांगडा विमानस्थलमा सञ्चारकर्मीसँग उनले उक्त जानकारी दिएका हुन् ।
दलाई लामाले भने,‘चीन परिवर्तन हुँदैछ र अब तिब्बतका जनता धेरै शक्तिशाली छन् भन्ने महसुस भएको छ।’
उनले भने, ‘तिब्बतको समस्या समाधान गर्न चीन मसँग सम्पर्क गर्न चाहन्छ र म पनि तयार छु।’
एक प्रश्नको जवाफ दिँदै दलाई लामाले भने, ‘म चीनसँग वार्ताका लागि सधैं तयार छु र हामीले पूर्ण स्वतन्त्रता नचाहेको कुरा वर्षौंअघि स्पष्ट गरिसकेको छु । हामी गणतन्त्र चीनको एक हिस्सा रहनेछौं।’
यसअघि जुलाई ६ मा दलाई लामाले धर्मशालामा आफ्नो ८८ औं जन्मदिन मनाएका थिए र आफ्नो निवास नजिकै रहेको मुख्य तिब्बती मन्दिरको दर्शन गरेका थिए। यस अवसरमा उपस्थित आफ्ना अनुयायीलाई सम्बोधन गर्दै दलाई लामाले भने– म कसैसँग रिसाएको छैन । तिब्बतप्रति कठोर व्यवहार गर्ने चीनका नेताहरूप्रति पनि म रिसाएको छैन। वास्तवमा, चीन ऐतिहासिक रूपमा बौद्ध राष्ट्र हो।’
