एजेन्सी । पाकिस्तानका पूर्वप्रधानमन्त्री इमरान खानले देशमा कानूनको शासनका लागि लडाइँ जारी राख्ने र आफु जेलमा परे पनि सम्झौता नगर्ने र आत्मसमर्पण नगर्ने बताएका छन् ।
आइतबार साँझ युट्युब मार्फत राष्ट्रलाई सम्बोधन गर्दै खानले आफ्नो लडाई आफ्नो देश र जनताको राम्रो भविष्यका लागि भएको बताए।
खानले भने, ‘उनीहरूले मलाई जेलमा हाले पनि, म न त सम्झौता गर्छु न आत्मसमर्पण गर्छु। म कानुनको शासन र मेरो देशका जनताको राम्रो भविष्यका लागि लडिरहनेछु।’
पाकिस्तान तहरीक–ए–इन्साफ (पीटीआई) पार्टीका ७० वर्षीय प्रमुख १९ वटा मुद्दामा आफ्नो अग्रिम जमानतको म्याद थप गर्न लाहोरबाट इस्लामावाद पुगेका छन्।
खान १४० भन्दा बढी मुद्दाको सामना गरिरहेका छन्। धेरै जसो मुद्दा आतंकवाद, जनतालाई हिंसामा उक्साउने, आगजनी, ईश्वरनिन्दा, हत्याको प्रयास, भ्रष्टाचार र ठगीसँग सम्बन्धित छन्।
