एजेन्सी । ग्रीसको तटमा ७५० यात्रु बोकेको डुंगा पल्टिँदा ३०० भन्दा बढी पाकिस्तानी नागरिकको मृत्यु भएको आशंका गरिएको छ । एक अधिकारीका अनुसार पाकिस्तान सरकारले मानव तस्करहरू विरुद्ध क्र्याक डाउन गर्दै देशका विभिन्न भागहरूबाट कम्तीमा १२ संदिग्ध व्यक्तिहरूलाई पक्राउ गरेको छ।
गत हप्ता डुङ्गा पल्टिँदा ४०० पाकिस्तानी, २०० इजिप्टियन र १५० सिरियाली सवार थिए।
तीमध्ये सिरियाली महिला र बालबालिका पनि थिए ।
पाकिस्तानी सिनेटका अध्यक्ष मुहम्मद सादिक संजरानीले ग्रीसको तटमा हालै भएको डुङ्गा दुर्घटनामा परी तीन सयभन्दा बढी पाकिस्तानी नागरिकको मृत्यु भएकोमा गहिरो दुःख व्यक्त गरेका छन् ।
उनको कार्यालयले ट्वीट गर्दै यो जानकारी दिएको हो ।
उनले भने, “दुःखको यस घडीमा शोकसन्तप्त परिवारजनप्रति गहिरो समवेदना व्यक्त गर्दछौं । हाम्रो समवेदना र प्रार्थना तपाईंसँग छ। दिवंगत आत्माको चिर शान्तिको कामना गर्दछौं।’
पाकिस्तानका प्रधानमन्त्री शहबाज शरीफले आइतबार मानव तस्करहरूलाई कारबाही गर्न आदेश दिएका छन्। यस डुङ्गा दुर्घटनामा ज्यान गुमाएकाहरुको सम्झनामा देशमा एक दिने शोकको घोषणा गरिएको छ । संघीय अनुसन्धान एजेन्सी (एफआईए) का एक शीर्ष अधिकारीले भने,‘उनीहरूले गत शुक्रबारदेखि कम्तिमा १२ संदिग्ध मानव तस्करहरूलाई पक्राउ गरेका छन्, जसमा कराची अन्तर्राष्ट्रिय विमानस्थलबाट दुबईको उडानमा चढ्ने प्रयास गर्ने एक जना पनि थिए।’
