एजेन्सी । हमासले युद्धविराम सम्झौताका शर्तहरू उल्लङ्घन गरेको आरोप लगाउँदै इजरायलले मुख्य सडक अवरुद्ध गरेपछि हजारौं विस्थापित प्यालेस्टिनीहरूलाई गाजा पट्टीको उत्तरमा रहेको आफ्नो घर फर्कन बाट रोकेको छ ।
अन्तर्राष्ट्रिय सञ्चार माध्यमका अनुसार हमासले चार जना इजरायली महिला सैनिकलाई रिहा गरेपछि र इजरायलले २०० प्यालेस्टिनी कैदीलाई रिहा गरेपछि विवाद उत्पन्न भएको हो ।
तर, इजरायली सरकारले इजरायली नागरिक आर्बेल येहुदको रिहाईको योजना नबने सम्म गाजावासीलाई उत्तर तर्फ यात्रा गर्न नदिइने बताएको छ । हमासले उनी जीवित रहेको र अर्को हप्ता रिहा हुने बताएको छ । सम्झौता अनुसार हमासले सैनिकको अगाडि सर्वसाधारणलाई रिहा गर्नुपर्ने थियो ।
शनिबार साँझ मध्य गाजाको अल–रसिद सडकमा घर फर्कनका लागि भीड जम्मा भइरहेका बेला गोली चलेको बताइएको छ । समाचार एजेन्सी रोयटर्सले हमास द्वारा सञ्चालित स्वास्थ्य मन्त्रालय र प्यालेस्टाइनी सञ्चार माध्यमलाई उद्धृत गर्दै एक व्यक्तिको मृत्यु भएको र केही घाइते भएको जनाएको छ ।इजरायली डिफेन्स फोर्सेज (आईडीएफ) ले मध्य गाजामा दर्जनौं शंकास्पद व्यक्तिहरूको पहिचान भएपछि सेनाले गोली चलाएको बताएको छ।
इजरायलीहरूले मध्यस्थहरू सँग मिस येहुदको लागि हमास बाट जीवनको प्रमाण मागेका छन् । सन् २०२३ अक्टोबर ७ मा हमासले बन्धक बनाएका चार जना महिला इजरायली सैनिकलाई युद्धविराम सम्झौता अन्तर्गत शनिबार रिहा गरिएको थियो ।
