एजेन्सी । ब्राजिलका राष्ट्रपति लुइज इनासियो लुला डा. सिल्भाको आफ्नै घरमा भएको दुर्घटनामा टाउकोमा चोट लागेपछि आफ्नो रुस भ्रमण रद्द गरेका छन् ।
ब्राजिल, रुस, भारत, चीन र दक्षिण अफ्रिका लगायतका प्रमुख विकासोन्मुख राष्ट्रको समूह ब्रिक्स शिखर सम्मेलनमा भाग लिन उनी रुस जाने कार्यक्रम थियो ।
राजधानी ब्रासिलियाको एक उच्च अस्पतालले राष्ट्रपतिलाई लामो दूरीको हवाइ यात्रा नगर्न सल्लाह दिएको जनाइएको छ। अब उनी भिडियो लिंकमार्फत बैठकमा सहभागी हुनेछन् ।
ब्रासिलियाको सिरियो–लिबानेस अस्पतालले एक विज्ञप्ति जारी गर्दै राष्ट्रपतिलाई लामो दूरीको यात्रा नगर्न सल्लाह दिइएको तर अन्य गतिविधिलाई सामान्य अवस्थामा नै निरन्तरता दिन सल्लाह दिएको जनाएको छ ।
लुलाको टाउकोको पछाडिको भागमा चोट लागेको र चिकित्सकहरुले उनको निगरानी गरिरहेको बताइएको छ ।राष्ट्रपतिको कार्यालयले ब्रासिलियाबाट भर्चुअल माध्यमबाट शिखर सम्मेलनमा भाग लिने र अन्य कामलाई निरन्तरता दिने जनाएको छ ।उनको कार्यालयले उनको चोटको बारेमा कुनै विवरण सार्वजनिक गरेको छैन।अस्पतालका चिकित्सकलाई उद्धृत गर्दै स्थानीय सञ्चारमाध्यमले जनाए अनुसार राष्ट्रपतिलाई टाउकोमा पाँचवटा टाँका लगायएको छ । उनलाई अस्पतालले भने डिस्चार्ज गरेर घर पठाएको छ ।
