एजेन्सी । इजरायल र हमासबीचको युद्धको आज ३८ औं दिन । बारम्बार इजरायली आक्रमण र वरपरको क्षेत्रमा भीषण लडाइँका बीच गाजाको सबैभन्दा ठूलो अल शिफा अस्पतालसँगको सम्पर्क टुटेको डब्लूएचओले दाबी गरेको छ।
आइतबार राति जारी एक विज्ञप्तिमा डब्ल्यूएचओले अस्पतालमा बारम्बार आक्रमणको डरलाग्दो रिपोर्टहरू आएको र अस्पतालसँग आफ्नो सम्पर्क टुटेको जनाएको छ ।
डब्ल्यूएचओले भनेको छ, ‘अस्पतालबाट भागेका केही व्यक्तिहरूलाई गोली हानेर घाइते बनाएको र मारिएको पनि रिपोर्ट आएको छ।’
सोमबार बिहानसम्म ६५० जना बिरामीहरू, ५०० जना जति स्वास्थ्यकर्मीहरू र लगभग १५०० जना विस्थापित मानिसहरू अझै अस्पताल भित्र छन्, प्यालेस्टिनी स्वास्थ्य मन्त्रालयले जारी गरेको अद्यावधिकमा उल्लेख छ ।
बिजुली, पानी र खानाको अभावमा उनीहरुको ज्यान जोखिममा रहेको र अस्पतालबाट बाहिर निस्कने सुरक्षित बाटो नभएको स्वास्थ्य मन्त्रालयले जनाएको छ ।
डब्ल्यूएचओले एक बिरामीको मृत्यु भएको समेत बताएको छ ।
