एजेन्सी । अमेरिकी राष्ट्रपति जो बाइडेनले गाजाबाट अमेरिकी नागरिकलाई बाहिर निकाल्न प्रतिबद्ध रहेको बताएका छन् । उनले धेरै अमेरिकी नागरिक गाजाबाट रफा क्रसिङ हुँदै इजिप्ट प्रवेश गरेको बताए ।
आगामी दिनहरूमा त्यहाँ फसेका सबै नागरिकहरूलाई सुरक्षित रूपमा उद्धार गर्ने उनले बताए ।
गाजामा करिब ४०० अमेरिकी नागरिक फसेका छन् । उनका परिवारका सदस्य पनि उनीहरुसँगै छन् ।
गाजाबाट घाइते प्यालेस्टिनी र विदेशी नागरिकको बाटो सुरक्षित गरेको उनले बताए ।
ती नागरिकहरू रफा क्रसिङ हुँदै इजिप्ट प्रवेश गर्ने उनले जानकारी दिए ।
अमेरिकी विदेश मन्त्रालयका प्रवक्ता म्याथ्यू मिलरले पछि एक पत्रकार सम्मेलनमा भने, गाजामा करिब ४०० अमेरिकीहरू छन्, ‘उनीहरुसँग हामी सम्पर्कमा छौं। ती मानिसहरू गाजा छोड्न चाहन्छन्।’
