एजेन्सी । इजरायल–हमास युद्ध सुरु हुनुका पछाडि धेरै देश र संगठनको भूमिका महत्वपूर्ण रहेको चर्चा चलेको छ । हमास विरुद्ध इजरायली सेनाको कारबाहीका क्रममा गाजा पट्टीमा पनि यसका धेरै प्रमाण भेटिएका थिए ।
इजरायली सेनाले हमास आतंककारीहरूबाट इरान र उत्तर कोरियाली हतियारको खेप बरामद गरेको छ।
यसैबीच लेबनानको खतरनाक इस्लामिक संगठन हिजबुल्लाहले ठूलो दाबी गरेको छ । इरान समर्थित यो संगठनले इजरायल–हमास युद्धमा आफ्नो महत्वपूर्ण भूमिका रहेको दाबी गरेको छ । हिजबुल्लाहले पहिलो पटक यो कुरा खुलेर स्विकार गरेको हो ।
लेबनानको चरमपन्थी संगठन हिजबुल्लाहले इजरायल र हमास बीचको युद्धमा मुख्य भूमिका रहेको र इजरायलले गाजा पट्टीमा जमिन आक्रमण गरेमा ठूलो मूल्य चुकाउनु पर्ने बताएको छ।
हिजबुल्लाहका उपनेता शेख नइम कासिमको यो कथन यस्तो बेला आएको हो जब इजरायलले दक्षिणी लेबनानमा बम विष्फोट र ड्रोन आक्रमण गरेको थियो र हिजबुल्लाहले इजरायलतर्फ रकेट र मिसाइल प्रहार गरेको थियो।
हिजबुल्लाहले शनिबारको आक्रमणमा आफ्ना छ जना लडाकु मारिएको बताएको छ, जुन दुई हप्ता अघि युद्ध सुरु भएयता एकै दिनमा भएको सबैभन्दा धेरै मृत्यु हो।
