चितवन । प्रधानमन्त्री पुष्पकमल दाहाल ‘प्रचण्ड’ ले गठबन्धनलाई थप बलियो बनाएर लैजाने कुरामा सहमति भएको बताएका छन् ।
गृह जिल्ला चितवन पुगेका प्रधानमन्त्री प्रचण्डले भरतपुर विमानस्थलमा पत्रकारसँग कुराकानी गर्दै उक्त धारणा व्यक्त गरेका हुन् ।
कोशीमा मुख्यमन्त्री बनाउने विषयमा गठवन्धनभित्र समस्या आएपछि उनले नेपाली काँग्रेसका सभापति देउवा र वरिष्ठ नेता शेखर कोइरालासँग वार्ता गरेका थिए ।
उनले भने “कहिलेकाही गठवन्धभित्रका पार्टीभित्र पनि अलि वादविवाद हुन्छ नै । त्यो वादविवादले गठवन्धनलाई झन बलियो बनाएर लैजानेछ ।”
उनले भने“आज विहान मात्रै काँग्रेस सभापति शेरवहादुर देउवा र नेता शेखर कोइरालासँग म आफै बैठक बसेर एउटा समझदारी बनाएको छु । गठवन्धनलाई बलियो बनाउने कुरामा हामीवीच समझदारी बनेको छ । कुनै पनि हालतमा गठवन्धनलाई कमजोर हुन दिनेछैनौं ।”
उनले भने, “नयाँ समझदारी अन्तर्गत कोशी प्रदेशमा कार्की (केदार कार्की) मुख्यमन्त्री हुनुभएको छ, त्यो हामी सवैको मुख्यमन्त्री हो । त्यसकारण त्यो समस्या जसरी सोचिएको थियो, त्यो केही होइन । मिडियामा जसरी चर्चा परिचर्चा गरिएको थियो त्यस्तो हैन । आज भएको सहमतीले गठवन्धनलाइ अझ वलियो वनाउन सहयोग पुग्नेछ ।”
