एजेन्सी। भारतको उत्तरी सिक्किमको ल्होनाक हिमताल विस्फोटमा परि मृत्यु हुनेको संख्या ३८ पुगेको छ। हिमताल विस्फोटपछि टिस्टा नदीमा आएको बाढीका कारण मानिसहरुको भत्यु भएको हो। अझै १८ सैनिकसहित ७८ जना हराईरहेका छन्।
बिहीबार साँझसम्म १८ जनाको मृत्यु भएको त्यहाँको राज्य सरकारले पुष्टि गरेको थियो। प्रहरी, सेना सहितको उद्धार टोलीले थप २० शव फेला पारेको हो।
धेरैजसो शव बंगलादेश सीमा क्षेत्रमा फेला परेको भारतीय अखबार टाइम्स अफ इन्डियाले जनाएको छ। बाढीले बगाएर पश्चिम बंगालको तल्लो भेट बंगलादेशको सीमा नजिक पुर्याएका शवहरु पनि उद्धार गरिएको छ।
बेपत्तामध्ये ४ जना सैनिकको शव बंगलादेश सीमा नजिक फेला परेको थियो। बाढीमा १८ भारतीय सैनिक अझै बेपत्ता छन्। भारतीय सैनिकको गोताखोर टोलीले बेपत्ता सैनिकको खोजी जारी राखेको छ।
हाल वर्षा रोकिएको र पानीको सतह कम हुँदै गएकाले खोजी तथा उद्धार कार्य तीव्र पारिएको छ।
