सिक्किममा बादल फाट्दा टिष्टा नदीमा बाढी, २३ सैनिक बेपत्ता

एजेन्सी । सिक्किममा बादल फाटेर टिस्टा नदीमा आएको बाढीका कारण २३ सैनिक बेपत्ता भएका छन् ।

डिफेन्स पीआरओका अनुसार मंगलबार बिहान १ः३० बजे बादल फाटेको थियो । जसकारण लाचेन उपत्यकाको टिष्टा नदीमा अचानक बाढी आएको हो ।

खोला नजिकैको क्षेत्रमा सेनाको क्याम्प रहेको थियो, जुन बाढीले बगाएको हो । गुवाहाटीका डिफेन्स पीआरओले भने– पानी एक्कासी बढेपछि चुङथाङ बाँधबाट पानी छोड्नुपरेको छ । यसपछि तल्लो क्षेत्रहरु पनि डुब्न थालेका छन् । यहाँ सिंगताम नजिकै बर्दाङमा पार्किङ गरेका सेनाका ४१ गाडी डुबेका छन् ।

सेनाका अनुसार बादल फाटेपछि टिस्टा नदीको पानीको बहाव एकाएक १५ देखि २० फिटले बढेको थियो । त्यसपछि खोला आसपासका क्षेत्रहरु डुबानमा परेका छन् । खोलाको पानी धेरैको घरमा पनि पुगेको छ । मानिसहरु घर छाडेर सुरक्षित ठाउँमा गएका छन् ।