एजेन्सी । रुस र युक्रेनबीच भीषण युद्ध जारी छ । यसैबीच रुसले युक्रेन र युक्रेनलाई सहयोग गरिरहेका पश्चिमी देशहरूमाथि ठूलो आरोप लगाएको छ ।
रुसले ब्ल्याक सीमा रहेको आफ्नो नौसैनिक आधारमा भएको आक्रमणमा युक्रेनका पश्चिमी देशहरुले सहयोग गरेको बताएको छ ।
रुसले बुधबार आरोप लगाएको छ कि गत हप्ता ब्ल्याक सी फ्लीट मुख्यालयमा मिसाइल आक्रमण गर्न युक्रेनलाई पश्चिमी देशहरुले सहयोग गरेका छन् ।
रुसी रक्षा मन्त्रालयका प्रवक्ता मारिया जाखारोभले सञ्चारमाध्यमलाई सम्बोधन गर्दै भनिन्, पश्चिमी गुप्तचर निकायहरू, नेटोका भूउपग्रह र जासुसी विमानहरूबाट लिइएका तस्बिरहरू प्रयोग गरी आक्रमणको योजना र पूर्वसूचनामा र समन्वयमा आक्रमण गरिएको हो भन्ने कुरामा कुनै शंका छैन। अमेरिकी र बेलायती सुरक्षा एजेन्सीहरूसँगको सल्लाह र सुझावमा उक्त आक्रमण भएको कुरामा कुनै दुईमत छैन ।
मस्कोले लगातार आरोप लगाएको छ कि अमेरिका र यसको नाटो सहयोगीहरूले युक्रेनलाई हतियार आपूर्ति गरेर र गुप्तचर प्रदान गरेर रसियाली प्रतिष्ठानहरूमा आक्रमणको योजना बनाउन मद्दत गरिरहेको छ । पश्चिमी देशहरु यस युद्धमा प्रभावकारी रूपमा संलग्न रहेको रसियाको आरोप छ ।
मिडिया रिपोर्टका अनुसार बेलायत र फ्रान्सले युक्रेनलाई आपूर्ति गरेको स्टर्म स्याडो मिसाइल मुख्यालयमा भएको आक्रमणमा प्रयोग गरिएको थियो।
बेलायतको रक्षा मन्त्रालयले रुसको आरोपमा तत्काल कुनै प्रतिक्रिया दिएको छैन। युक्रेनको दावीको विपरीत फ्लीट कमाण्डर एडमिरल भिक्टर सोकोलोभ अझै जीवित रहेको एक भिडियोले देखाएपछि यो आरोप लगाइएको हो।
