एजेन्सी । १८ महिनाभन्दा बढी समयदेखि चलिरहेको रुस–युक्रेन युद्धले पश्चिमा राष्ट्रहरूको मनोबल क्रमशः भत्किँदै गएको छ । युक्रेनलाई सहयोग गर्दै गर्दा पश्चिमी र युरोपेली देशको भण्डार खाली हुन थालेको छ । साथै, यसप्रति उनीहरूको चासो पनि घट्न थालेको छ । रुसलाई जित्न सजिलो छैन भनेर पश्चिमी देशहरूले पनि बुझेका छन् । आखिर, उनीहरुले कहिलेसम्म युक्रेनलाई सहयोग गरिरहन्छन् ?
उता फेरि युक्रेनमा हतियार र गोला बारुदको अभाव भएको छ।
हालसम्म आधाभन्दा बढी समय युक्रेनलाई रक्षा प्याकेज दिएको अमेरिका एक मात्र देश हो । तर, यो एक्लैले काम गर्दैन। त्यसैले रुसविरुद्धको युद्धलाई बलियो बनाउन राष्ट्रपति जेलेन्स्कीले फेरि पश्चिमा मुलुकबाट समर्थन जुटाउन थालेका छन् ।
जेलेन्स्कीले शुक्रबार क्यानडाको संसदलाई सम्बोधन गरे र रुसको आक्रमणको बिरूद्ध अधिक पश्चिमी समर्थन जुटाउने अभियान सुरु गरेका छन् ।
यसअघि उनले अमेरिकी राष्ट्रपति जो बाइडेन र सांसदहरूसँग वासिङ्टनमा भेटवार्ता गरेका थिए । त्यसपछि त्यहाँबाट जेलेन्स्की बिहीबार राति क्यानडाको राजधानी उडेका थिए।
क्यानडा जानुअघि उनले बुधबार संयुक्त राष्ट्र संघको वार्षिक बैठकलाई पनि सम्बोधन गरेका थिए ।
त्यहाँ पनि जेलेन्स्कीले पश्चिमी र युरोपेली देशहरूबाट निरन्तर सहयोग मागेका थिए।
ओटावा पुगेपछि क्यानडाका प्रधानमन्त्री जस्टिन ट्रुडोले जेलेन्स्कीलाई ओटावा विमानस्थलमा न्यानो स्वागत गरेका थिए । ‘मस्कोले हार्नेछ’, जेलेन्स्कीले संसदलाई सम्बोधन गर्ने क्रममा भने।
रुसको पराजय निश्चित रहेको उनले बताए।
युक्रेनी राष्ट्रपतिले क्यानडा सधैं इतिहासको उज्यालो पक्षमा रहेको बताए।
जेलेन्स्कीले क्यानडाको सहयोगले यस युद्धमा हजारौंको ज्यान बचाउन मद्दत गरेको बताए।
