एजेन्सी । भारतको मुम्बईस्थित जापानी वाणिज्य दूतावासका एकजना वरिष्ठ अधिकारीकी श्रीमतीलाई मंगलबार साँझ एक चोरले निशाना बनाए ।
उनको ११ हजार नगद, परिचयपत्र र कागजपत्रसहितको झोला चोरी हुन पुग्यो ।
मालाबार हिल्स निवासी ५२ वर्षीया श्रीमती भारतीय संस्कृतिको अनुभव गर्न र गणपति जुलुस हेर्न श्रीमानसँग दक्षिण मुम्बईको हर्निमन सर्कल जाँदै गर्दा यो घटना भएको हो।
पीडितको उजुरीको आधारमा मुम्बई पुलिसले कारबाही गर्यो र सीसीटीभी क्यामेराको सुरागको आधारमा आरोपीलाई पाँच घण्टाभित्रै पत्ता लगाएर पक्राउ गर्न सफल भयो।
मिडिया रिपोर्टका अनुसार २६ वर्षीय आरोपी मोहम्मद अरबाज अब्दुल सत्तार सिद्दीकी ड्राइभरको रूपमा काम गर्छन् र स्यामुएल स्ट्रिट, पाइधोनीका निवासी हुन्।
जापानी वाणिज्य दूतावासका अधिकारीकी पत्नी ताज वेलिंग्टन मेउज गएकी थिइन् र पछि बुधबार साँझ ७ः४५ बजे गणपतिको जात्रा हेर्न हर्निमन सर्कलतर्फ गएकी थिइन् ।
त्यही क्रममा स्कुटरमा सवार एक चोर आएर उनको झोला तानेका थिए ।
प्रहरीका अनुसार झोलामा ११ हजार रुपैयाँ नगद, परिचयपत्र र कागजपत्र रहेको थियो ।
