काठमाडौँ। जापानका प्रधानमन्त्री फुमियो काशिदाले सरकारप्रति जनताको विश्वास गुम्दै गएपछि मन्त्रिमण्डल पुनर्गठन गरेका छन्।
बुधबार प्रधानमन्त्रीले सरकार र आफ्नो सत्तारुढ डेमोक्रेटिक पार्टी (एलडीपी) पार्टीप्रति जनताको विश्वास घट्दै गएपछि मन्त्रिमण्डल पुनर्गठन गरेका हुन्। उनले एकैपटक १३ मन्त्री फेरेका छन्।
पुनर्गठनमा १९ मध्ये १३ जना मन्त्री परिवर्तन भएका छन्। जसमध्ये ११ जना पहिलो पटक मन्त्री बनेका हुन्। बुधवार घोषणा गरिएअनुसार अर्थमन्त्री शुनिची सुजुकी, मुख्य क्याबिनेट सचिव हिरोकाजु मात्सुनो र उद्योगमन्त्री यासुतोशी निशिमुरालगायत ६ जना वर्तमान क्याबिनेट सदस्य आफ्नै पदमा रहनेछन्।
योशिमासा हयाशीको स्थानमा परराष्ट्रमन्त्रीमा पूर्वन्यायमन्त्री योको कामिकावा नियुक्त भएका छन्। मन्त्रिपरिषद्मा महिलाको संख्या दुईबाट पाँच पुगेको छ।
जापानमा राष्ट्रिय परिचयपत्र प्रणालीलाई लिएर जनताको असन्तुष्टि, मूल्य वृद्धिलगायतका कारण सरकारको आलोचना हुँदै आएको थियो।
गत वर्षयता प्रधानमन्त्री फुमियोले दोस्रो पटक मन्त्रिमण्डल पुनर्गठन गरेका हुन्।
