एजेन्सी । अमेरिकी पूर्व राष्ट्रपति डोनाल्ड ट्रम्प २०२० को राष्ट्रपतीय निर्वाचनको नतिजा परिवर्तन गर्न खोजेको आरोपको सामना गर्दै बिहीबार अदालतमा हाजिर भएका थिए ।
डोनाल्ड ट्रम्पले आफूलाई निर्दोष घोषणा गरेका छन्, यस मामिलामा अब अगस्ट २८ मा यो मुद्दाको टुंगो लाग्नेछ ।
अब प्रश्न उठ्छ कि यदि डोनाल्ड ट्रम्प दोषी प्रमाणित भएमा उनी राष्ट्रपतिको चुनाव लड्न सक्षम हुनेछन् वा रिपब्लिकन पार्टीको उम्मेदवार बन्नु अघि नै दौडबाट बाहिरिनेछन्।
बिहीबार डोनाल्ड ट्रम्प न्यु जर्सीको अदालतमा हाजिर भएका थिए, जहाँ उनले आफूलाई निर्दोष घोषणा गरेका थिए। डोनाल्ड ट्रम्प नोभेम्बर २०२० मा हुने अमेरिकी राष्ट्रपतीय निर्वाचनको नतिजा रोक्न र परिवर्तन गर्न खोजेको आरोपमा उनीमाथि मुद्धा चलिरहेको छ ।
उक्त चुनावमा डेमोक्र्याटका जो बाइडेनले रिपब्लिकन पार्टीका डोनाल्ड ट्रम्पलाई पराजित गरेका थिए, त्यसपछि कतिपय ठाउँमा ट्रम्पले गलत मतगणनाको आरोप लगाएका थिए र अवरोध खडा गरेका थिए।
डोनाल्ड ट्रम्पको यो मुद्दाको सुनुवाई भारतीय मूलका अमेरिकी न्यायाधीश मोक्सिला उपाध्यायले गरिरहेकी छिन् । ७७ वर्षीय डोनाल्ड ट्रम्प विगत केही महिनादेखि अदालत धाइरहेका छन् । केही समयअघि उनी एक मुद्दामा पक्राउ पनि परेका थिए, तर पछि जमानतमा छुटेका थिए ।
डोनाल्ड ट्रम्पले सन् २०२४ को राष्ट्रपतीय निर्वाचनमा पुनः उम्मेदवारी दिने घोषणा गरेका छन् र त्यसका लागि उनले आफ्नो अभियान पनि सुरु गरेका छन् । विशेष कुरा के छ भने डोनाल्ड ट्रम्पले अगस्ट २८ मा अदालतमा हाजिर हुनुपर्नेछ र त्यसअघि रिपब्लिकन पार्टीको उम्मेदवारीका लागि बहसको प्रक्रिया पनि सुरु हुनेछ ।
डोनाल्ड ट्रम्पको मुद्दामा सुनुवाइ सुरु भइसकेकाले उनले चुनावी प्रचार गर्न नपाउने भन्ने प्रश्न उठेको छ । मुद्दाको सुनुवाइ हुँदा पनि व्यक्तिले चुनाव लड्न र प्रचार गर्न सक्छ । तर, उनले पहिले पार्टी स्तरमा उम्मेदवारीको लडाइँ जित्नुपर्नेछ, जसका लागि यही महिनादेखि बहस सुरु हुनेछ ।
कुनै मुद्दाको सुनुवाइका लागि लामो समय कुर्नु पर्ने अवस्था अमेरिकामा प्रायः देखिएको छ । विज्ञहरूले पनि यस विषयमा छिटो सुनुवाइ हुने आशा कमै गरेका छन्, यस्तो अवस्थामा यी विषय डोनाल्ड ट्रम्पका लागि राष्ट्रपति चुनावमा बाधा बन्नेछैन । अर्थात् आगामी वर्ष हुने निर्वाचनमा डोनाल्ड ट्रम्प विजयी भए उनी राष्ट्रपति बन्न सक्छन् ।
