भीषण बाढीको चपेटामा चीन, बेइजिङमा २० जनाको मृत्यु, २७ जना बेपत्ता

एजेन्सी । छिमेकी राष्ट्र चीन भीषण बाढीको चपेटामा परेको छ । अविरल वर्षाका कारण चीनका सडकहरु पानीले भरिएका छन् । बाढीको पानीले चिनियाँ रेलवे स्टेशनहरू समेत भरिएको छ। जसका कारण राजधानी बेइजिङलगायत अन्य स्थानमा रेल सञ्चालन रोकिएको छ ।

चीनको राजधानी बेइजिङ वरपरका क्षेत्रमा केही दिनदेखि परेको भीषण वर्षाका कारण आएको बाढीमा परी कम्तीमा २० जनाको मृत्यु भएको छ भने २७ जना बेपत्ता भएका छन् ।

मिडिया रिपोर्टका अनुसार धेरै ठाउँमा बाढी यति भयावह थियो कि घर र सवारीसाधन पात झैं बगाएको थियो ।

चीनको सरकारी सञ्चारमाध्यमले मंगलबार सो जानकारी दिएको हो । राज्य प्रसारक सीसीटीभीले भारी वर्षाका कारण रेलवे स्टेशनहरू बन्द गर्नुपरेको र प्रभावितहरूलाई विद्यालयमा आश्रय दिइएको बताएको छ। बाढीको पानीले मानिसको घर भरिएको र सडकहरु बगेको उनले बताए ।