एजेन्सी । अफगानिस्तानमा तालिबानले सत्ता कब्जा गरेदेखि कट्टरपन्थी विचारधारा भएका आदेशहरू जारी भएका छन्। अफगानिस्तानका महिलाहरु सबैभन्दा बढी पीडित भएको अन्तराष्ट्रिय मिडियाहरुले रिपोर्ट जारी गर्दै पनि आइरहेका छन् ।
तालिबानले महिलालाई ब्यूटी सैलुनमा जान प्रतिबन्ध लगाउने, बजार जान प्रतिबन्ध लगाउने, अनिवार्य रूपमा बुर्का लगाउने, महिलाहरूलाई शिक्षाबाट वञ्चित राख्ने जस्ता धेरै आदेश जारी गरेको छ ।
यसै क्रममा अफगानिस्तानको तालिवान सरकारले अर्को आदेश जारी गरेको छ । यो आदेश पनि महिलासँग सम्बन्धित छ।
अफगानिस्तानको तालिबान सरकारले महिला दमन गर्न अर्को कदम चालेको छ । नयाँ अध्यादेशमा अब महिलाहरुलाई बुर्का नलगाई ट्याक्सीमा बस्न समेत प्रतिबन्ध लगाइएको छ । मिडिया रिपोर्टका अनुसार हेरातका ट्याक्सी ड्राइभरको विश्वास गर्ने हो भने अब बुर्काले पूरै ढाकेका महिलालाई आफ्नो कारमा बस्न दिनेछन् ।
यदि कुनै महिलालाई बुर्का नलगाई बसेमा तालिबान सरकारले कारबाही गर्ने बताइएको छ । त्यस्तै सवारीसाधन पनि जफत हुने बताइएको छ ।
