काठमाडौँ । द डेलिगेसन अफ द युरोपियन युनियन टु नेपालले नेपाल–युरोपियन युनियन चलचित्र महोत्सव २०२४ आयोजना गर्दैछ। चलचित्र महोत्सव आगामी चैत ७ गतेदेखि १० गतेसम्म चल्नेछ ।
यो वर्षको चलचित्र महोत्सव युरोपियन युनियन–नेपाल दौत्यसम्बन्ध स्थापना भएको ५०औँ वार्षिकोत्सव मनाउन गरिएका विविध कार्यक्रमहरूको श्रृंखलाको एउटा हिस्सा रहेको आयोजकको भनाइ छ ।
‘युरोपियन युनियन–नेपाल सम्बन्धको पचास वर्षः साँस्कृतिक विविधताको उत्सवु’ मूल नारा रहेको यो महोत्सवको १३औं संस्करण हो । महोत्सव काठमाडौँको सुन्धारास्थित सीटीसी मलमा रहेको सीडीसी सिनेमामा हुनेछ ।
महोत्सवको उद्घाटन कार्यक्रममा निम्ता गरिएका अतिथिहरुको मात्र सहभागीता रहनेछ भने अरु दिन सबैका लागि खुल्ला रहनेछ । उद्घाटनको दिन मार्टीन म्याकडोनागले निर्देशन गरेको विभिन्न अवार्ड जितेको चलचित्र ‘द ब्यानशीस अफ इनीशेरीन’सँगै शान्ता नेपालीद्वारा निर्देशित चलचित्र डाय ड्रिम्स प्रदर्शित हुनेछ ।
महोत्सवको हरेक स्क्रिनिङमा एउटा नेपाली र अर्को युरोपियन चलचित्र गरी दुई वटा फिल्महरु देखाइने छ । महोत्सवको लागि लघु चलचित्र छनौट गर्न नेपाली युवा चलचित्र निर्देशकहरुका लागि लघु चलचित्र प्रतिस्पर्धा आयोजना गरिएको थियो । विजेता चलचित्रका निर्देशकहरूसहित अन्य युवा निर्देशकहरु ब्रसेल्समा आयोजना हुने नेपाली चलचित्रहरुको महोत्सवमा सहभागी हुनेछन् ।
महोत्सवमा भाग लिने युवा निर्देशकहरूको छनौट भने बाँकी रहेको छ । यो महोत्सवको लागि १० वटा लघु नेपाली चलचित्रहरु प्रतिस्पर्धामार्फत छनौट गरिएको थियो। प्रतिस्पर्धामा युवा नेपाली चलचित्र निर्देशकले ठूलो संख्यामा चलचित्रहरु पठाएका थिए ।
‘युरोपियन युनियन र नेपालको दौत्य सम्बन्धको ५० वर्ष मनाउन युरोपको विविधतापूर्ण संस्कृति, जीवनशैली र सिनेम्याटिक सृजनशीलता काठमाडौँ, लुम्बिनी, कर्णाली र सुदूरपश्चिमका नेपाली दर्शकहरूसँग आदानप्रदान गर्न पाउँदा म अत्यन्त हर्षित छु,’ नेपालका लागि युरोपियन युनियनका उपप्रमुख डा. जोएल इभोनेटको भनाइ छ ।
महोत्सव अवधिभर नौ वटा युरोपियन चलचित्रहरु र ११ नेपाली लघु चलचित्र प्रदर्शित हुनेछन् ।
