काठमाडौँ । हिमाल कडरियाको निर्माणमा तयार हुन लागेको फिल्म ‘गाउँ नै रमाइलो’मा नायिका मिरुना मगरको इन्ट्री भएको छ । निर्माता कडरियाले नायिका मिरुना मगरसँग कागजी सम्झौता भएको जानकारी दिएका छन् ।
यसअघि यो फिल्ममा नायकद्धय आर्यन सिग्देल र दयाहाङ राई फाइनल भइसकेका छन् । फिल्ममा मिरुना कसको जोडीको रूपमा देखिन लागेकी हुन् भन्ने खुलेको छैन ।
यस्तै, फिल्ममा बुद्धि तामाङको पनि प्रवेश भएको छ । फिल्ममा अब अन्य केही लिड कलाकार फाइनल गर्न बाँकी रहेको निर्माता कडरियाले जानकारी दिएका छन् ।
यो फिल्मलाई दिनेश राउतले निर्देशन गर्दैछन् । दिनेशले फिल्म ‘पुजार सार्की’पछि यो फिल्मको निर्देशन थाल्नेछन् ।
फिल्मलाई आउँदो वर्षको दशैंमा रिलिज गर्ने घोषणा निर्माणपक्षले गरिसकेको छ । क्लक वार्क क्रिएशनको ब्यानरमा निर्माण हुन लागेको यो फिल्मले गाउँको रोचक कथालाई प्रस्तुत गर्नेछ ।
निर्माता कडरियाले बनाएको फिल्म ‘नाङ्गो गाउँ’ यो वर्षको हिट फिल्म हो । उनले फिल्म ‘नाङ्गो गाउँ २ र दुःखी आत्मा’ निर्माणको पनि घोषणा गरिसकेका छन् ।
फिल्म ‘गाउँ नै रमाइलो’लाई नेपालमा आरआर फिल्मसले वितरण गर्नेछ । ओभरसिजमा भने यो फिल्मलाई एमएसएम इन्टरटेन्मेन्टले वितरण गर्नेछ ।
