एजेन्सी । पान मसालाको विज्ञापन गरेपछि अक्षय कुमार फेरि विवादमा परेका छन् । अक्षय कुमारलाई आईसीसी विश्वकप क्रिकेटमा भारत र अष्ट्रेलियाबीचको खेलमा नयाँ विज्ञापनमा देखियो, जसमा उनी शाहरुख खान र अजय देवगनसँग देखिएका थिए ।
यो विज्ञापनपछि उनलाई धेरै ट्रोल गरिएको थियो किनभने गत वर्ष उनले पान मसालाको विज्ञापनका लागि माफी मागेका थिए र आफूले कहिल्यै तम्बाकुको प्रचार नगर्ने बताएका थिए ।
खेलको क्रममा देखाइएको पान मसालाको विज्ञापन सामाजिक सञ्जालमा भाइरल भयो । विज्ञापनमा अजय देवगन र शाहरुख खान अक्षयसँग पान मसालाको प्रमोशन गरिरहेका देखिन्छन् । यो विज्ञापनको भिडियो भाइरल भएसँगै अक्षयको सामाजिक सञ्जालमा चर्को आलोचना भइरहेको छ ।
भिडियोमा कमेन्ट गर्दै एक प्रयोगकर्ताले लेखेका छन्, ‘अक्षय कुमारले आफ्ना फ्यानहरू दुखी भएकाले आफूले पान मसालाको विज्ञापन कहिल्यै नखेल्ने बताएका थिए । त्यसोभए यो फेरि किन ?’ जबकि अर्काले लेखे, ‘उनी प्यान इन्डिया स्टार होइनन्, उनी पान इन्डिया स्टार हुन् ।’
