काठमाडौँ। हिप्को सुपरबिल्ड उद्योगले वीरगञ्जमा स्टिल फ्याब्रिकेसन तालिम एवम् रोजगार कार्यक्रम सञ्चालन गर्ने भएको छ। हुलास स्टिल उद्योग अन्तर्गतको हिप्को सुपरबिल्डले वीरगञ्ज महानगरपालिका–३१ बेलवाको परसौनीस्थित हिप्को सुपरबिल्डको कारखानामा तालिम तथा रोजगार कार्यक्रम सञ्चालन गर्ने भएको हो।
उद्योगका अनुसार असार महिनामा सञ्चालन हुने यो तालिम सात दिनसम्म चल्ने छ। मधेश प्रदेश र लुम्बिनी प्रदेशमा स्थायी वा अस्थायी रुपमा बसोबास गरिरहेका नेपाली नागरिकहरु तालिममा सहभागी हुन पाउने छन्।
तालिम विशेष गरी स्टिलरफलामका श्रमिक, महिला, अति निम्न आय भएका व्यक्ति र विपन्न वर्गलाई लक्षित गरिएको उद्योगको भनाइ छ। तालिमले निर्माण र निर्माण सामग्री उत्पादन गर्ने निजी क्षेत्रका कलकारखानाहरुलाई आफ्नो व्यवसायको माग अनुसारको दक्ष कामदार प्रदान गर्दछ।
हुलास स्टिलले प्राकृतिक श्रोत र सामाजिक विकासलाई सन्तुलनमा ल्याउँदै समग्र मुलुकको दिगो आर्थिक वृद्धिमा महत्वपूर्ण योगदान दिँदै आएको उद्योगको भनाइ छ।
यस कार्यक्रमले नेपालको श्रम बजारको प्रमुख चुनौतीलाई समाधान गर्न बेलायत सरकारद्वारा सहयोगार्थ रोजगारका लागि सीप कार्यक्रम नेपालको लुम्बिनी र मधेश प्रदेशमा कार्यान्वयन हुँदै आएको छ।
कार्यक्रमलाई दिवाकर गोल्छा कर्पोरेसन अन्तर्गत हुलास स्टिल उद्योग लिमिटेड र हिप्को सुपरबिल्डले संयुक्त रुपमा कार्यान्वयन गर्दै आइरहेको छ भने यसको साझेदारी नेपाल उद्योग परिसंघ र मेक इन नेपाल ९स्वदेशी० अभियानले गरेका छन्।
