बागलुङ । गलकोट नगरपालिका वडा नं ४ को केन्द्र ओखरबोट राजधानी काठमाडाैँ रात्री डिलक्स बस सेवा सुरू भएको छ । निसीभुजी उत्तरगंगा बराह यातायात बहुउद्येश्यीय प्रा.लि ले स्थानिय सँगको सहकार्यमा बस सेवा सञ्चालन गरेको हो । बागमती प्रदेश ०१००६ ख ३९९६ नम्बरको ‘डिलक्स’ बस पहिलो पटक यात्रु लिएर यहाँबाट नयाँ काठमाडाैँका लागि प्रस्थान गरेको छ ।
सेवा शुभारम्भ गर्दै गलकोट नगरपालिका वडा नं ४ का वडा अध्यक्ष बल बहादुर खत्रीले गाउँबाटै राजधानी सम्मको बससेवाले सार्वजनिक यातायात सेवामा नयाँ आयाम थपेको बताए । उनले सर्वसाधारण नागरिक प्रति समर्पित रहेर स्तरीय र मर्यादित सेवा प्रदान गर्न समितिलाई आग्रह गरे ।
बससेवा ओखरबोटबाट दैनिक दिउँसो ३ बजेदेखि ४ बजे सम्मको समयमा सुचारु रहने समितिले जनाएको छ । काठमाडाैँबाट पनि सोही अनुसार बस छुट्नेछ । ग्रामिण क्षेत्रमा बस्ने नागरिकलाई लक्षित गरि यात्रुको चाहाना र सुविधालाई दृष्टिगत गरी ‘डिलक्स’ बसबाट सेवा शुभारम्भ गरिएको सरोकारवाला तथा युवा समाजसेवी महेन्द्र खड्काले जानकारी दिए ।
मध्यपहाडी लोकमार्ग अन्तर्गत बागलुङको निसीखोला गाउँपालिका भल्कोबाट छुटेको बस जुग्जाखोला, बुर्तिबाङ बजार, खर्बाङ बजार, गलकोट हटिया बजार हुँदै ओखरबोट, नरेठाँटी, भ्यूटावर, अक्षेते बागलुङ बजार हुँदै काठमाडाैँसम्म पुग्नेछ ।
ओखरबोटमा काउन्टर स्थापना गरी बस सेवाको शुभारम्भ गरिएको बताईएको छ अब प्रचार प्रसार र व्यवस्थापनको काम अगाडी बढाईने काउन्टर सञ्चालक गंगा बहादुर खत्रीले बताए ।
बस सेवाबाट स्थानियबासी प्रत्यक्ष लाभान्वित हुनेछन् । गाउँबाटै बस सेवा उपलब्ध भएपछि बस चढन हटिया बजार र मध्यपहाडी लोकमार्गमा नै पुग्नु पर्ने बाध्यता हटेको छ । यात्रुको चाप अनुसार सेवालाई थप विस्तार गरिने समितिले जनाएको छ ।
