काठमाडौँ। पर्सामा आर्थिक मन्दीको प्रत्यक्ष असर परेको देखिएको छ। आर्थिक मन्दीका कारण आर्थिक वर्ष २०७९/८० मा पर्साका १७७ उद्योग बन्द भएका छन्।
आर्थिक वर्ष २०७९/८० मा १७७ उद्योगले लगत कट्टा गराएको घरेलु तथा साना उद्योग कार्यालयले जनाएको छ। आर्थिक वर्ष २०७८/७९ मा भने पर्सामा १५२ उद्योगले लगत कट्टा गरिएका थिए।
बैंक तथा वित्तीय संस्थाबाट ऋण लगानी नहुनु, पुँजीको अभावलगायतका कारणले उद्योगहरु बन्द हुँदै गएको घरेलु तथा साना उद्योग कार्यालय पर्साले जनाएको छ।
घरेलु तथा साना उद्योग कार्यालयमा आर्थिक वर्ष २०७९/८० मा एक हजार ८९ नयाँ उद्योग दर्ता भएका थिएभने आर्थिक वर्ष २०७८/८९ मा एक हजार ४८० उद्योग दर्ता भएका थिए।
कार्यालयका अनुसार आव २०७९/८० मा एक हजार २७५ उद्योगको नवीकरण, १६५ वटाको पुँजीवृद्धि, ३३ वटाको ठाउँसारी र ८४ वटाको नामसारी भएका थिए।
यस्तै आर्थिक वर्ष २०७९/८० मा एक करोड ६ लाख ३९ हजार २५० रुपैयाँ राजस्व संकलन भएको थियो भने चार हजार ४६० जनाले रोजगारी पाएको बताइएको छ।
