काठमाडौँ। प्रधानमन्त्री पुष्पकमल दाहाल प्रचण्डले अर्थतन्त्र सुधारको लागि बोल्न डिसिजन लिन आवश्यक भएको बताएका छन्। नेपाल उद्योग बाणिज्य महासंघले आयोजना गरेको राष्ट्रिय आर्थिक बहस ‘सुधारका लागि सहकार्य’ कार्यक्रमलाई सम्बोधन गर्दै प्रधानमन्त्रीले यस्तो बताएका हुन्।
उनले उद्योग बाणिज्य महासंघ लगायतका अन्य उद्योगी ब्यवसायी देखि सबैका प्रतिनिधिमुलक धारणा सुनेपछि प्रधानमन्त्रीले अर्थतन्त्र गम्भीरअवस्थामै रहेको स्वीकारेका हुन्। उनले यसलाई सुधार्न बोल्ड डिसिजन नै लिनुपर्ने बेला आएको पनि बताए।
‘अर्थतन्त्र पक्कै पनि गम्भीर अवस्थामा छ। अलिकति बोल्ड डिसिजन लिनेतिर अगाडि नबढ्ने हो भने हामी झन् अप्ठ्यारो परिस्थितितिर जान सक्ने खतरा छ। यसका आन्तरिक आयाम छन्। यसका राष्ट्रिय र अन्तर्राष्ट्रिय आयाम पनि छन्,’ प्रधानमन्त्रीले भने, ‘निर्णायक चाहिँ हामी आफैँ हो। नेपाललाई कता र कसरी लैजाने भन्ने कुरामा नेपालको राजनीतिक दलहरूले, अर्थशास्त्री र व्यवसायीहरूले महत्त्वपूर्ण भूमिका खेल्नुपर्ने हुन्छ। आजको दुनियाँमा बाह्य कारण पक्कै हुन्छ। निर्णायक हामी आफैँ हो।’
उनले नेपालको हालत पनि श्रीलंकाजस्तो हुन्छ भन्ने भ्रम पनि यही बेला फैलाइएको बताए। तर उनले श्रीलंकाको जस्तो अवस्थामा भने नेपालको आर्थिक अवस्था नरहेको र त्यस्तो हुने सम्भावना समेत नरहेको प्रष्ट पारे। उनले आर्थिक क्षेत्र सुधारका लागि सबैको सामुहिक सहकार्य आवश्यक रहेको औल्याए।
‘टालटुले तरिकाले अर्थतन्त्रको सुधार हुँदैन। रेडिकल र बोल्ड निर्णय गर्नुपर्नेछ। वित्तीय र मौद्रिक नीतिमा तालमेल गर्न सरकारले केही न केही सुधार भएको छ। तर, मूल सुधार बाँकी छ,’ प्रधानमन्त्रीले भने।
प्रधानमन्त्रीले, अर्थतन्त्रको समस्या समाधान गर्न उच्चस्तरीय संयन्त्र बनाउन सहमत भएको बताए। समस्या समाधान गर्न निजी क्षेत्र, सरकार, विज्ञ, अर्थमन्त्रालय, राष्ट्र बैंक, प्रधानमन्त्री कार्यालयबाट सहभागी हुनेगरी यस्तो संयन्त्रको खाँचो रहेको उनको भनाई छ।
