काठमाडौँ। महालक्ष्मी विकास बैंकले आफ्ना ग्राहकले विभिन्न संस्थामा विशेष छुट प्राप्त गर्नेगरी सम्झौता गरेको छ। बैंकले स्वास्थ्य, होटल तथा रेष्टुरेन्ट क्षेत्रका संस्थासँग समन्वय गरी अघि बढ्न विभिन्न संस्थाहरूसँग सम्झौता गरेको जानकारी दिएको हो।
सम्झौता पश्चात महालक्ष्मी विकास बैंकका डेबिट अथवा क्रेडिट कार्ड तथा मोबाइल बैंकिङ्ग प्रयोग गर्ने ग्राहकहरूले उक्त संस्थाहरूका विभिन्न सेवाहरूमा विशेष छुट प्राप्त गर्न सक्नेछन्। बैंकका ग्राहकहरूले पर्साको वीरगञ्जस्थित मंगलम डायग्नोस्टिक सेन्टरको प्याथोलोजी टेस्ट सेवामा १०, बाराको सिमरास्थित होटल क्वीक–२० एण्ड रिभरसाइड प्रालिका सेवामा अधिकतम १० र मकवानपुरको हेटौंडास्थित रिगल हेटौंडा रिजोर्ट प्रालिमा अधिकतम १५ प्रतिशत छुट प्राप्त गर्ने बैंकल जानकारी दिएको छ।
यसैगरी धनगढी कैलालीमा अवस्थित निसर्ग हस्पिटल प्रालिका सेवामा अधिकतम २०, मकवानपुरको विशुद्ध मोमोचामा १० र चितवन भरतपुरस्थित कविलास रिजोर्ट एण्ड फनपार्कका सेवामा अधिकतम १० प्रतिशत छुट प्राप्त गर्न सक्ने बैंकले जनाएको छ।
यस किसिमको सहकार्यबाट बैंकका डेबिट अथवा क्रेडिट कार्ड तथा मोबाइल बैंकिङ्ग प्रयोग गर्ने ग्राहकहरू प्रत्यक्ष रूपमा लाभान्वित हुने विश्वास बैंकले लिएको छ।
