काठमाडौँ। वीरगञ्ज इन्ष्टिच्यूट अफ टेक्नोलोजी र दिवाकर गोल्छा कर्पोरेसन बीच शिक्षा र रोजगारी जोड्ने सम्बन्धमा सम्झौता भएको छ। शिक्षा र रोजगार जोड्न निजी क्षेत्रले स्टील फ्याब्रिकेसन सम्बन्धी तालिम तथा रोजगार दिने र वीरगञ्ज इन्ष्टिच्यूट अफ टेक्नोलोजीले दक्ष विद्यार्थी पठाउनेबारे सम्झौता भएको हो। स्व. दिवाकर गोल्छाको ७० औं जन्म जयन्तिको उपलक्ष्यमा यस्तो सम्झौता भएको हो।
सम्झौता अनुसार तालिम–व्यावसायिक शिक्षा र निजी क्षेत्र बीचको श्रम बजारको बेमेललाई कम गरी व्यावसायिक तालिमलाई सोझै रोजगारसँग जोड्ने लक्ष्य रहेको वीरगञ्ज इन्ष्टिच्युट अफ टेक्नोलोजीका प्राध्यापक निरज श्रीवास्तवले जानकारी दिए।
दिवाकर गोल्छा कर्पोरेसनले समग्र क्षेत्रमा दिगो रुपमा योगदान गर्दै जाने लक्ष्य राखेको हुलास स्टीलका वित्तीय प्रमुख सुनिल मनौतले बताए। नेपाल उद्योग परिसंघको मेक इन नेपाल स्वदेशी अभियानको एक प्रमुख अभियान्ताको रुपमा दिवाकर गोल्छा कर्पोरेशन समेत रहेको उनले बताए।
नेपाली कामदारले पनि निजी क्षेत्रको माग अनुसार तालिम पायो भने भारत लगायत अन्य मुलुकमा रहेको श्रमको निर्भरतालाई कम गर्ने र नेपाली कामदारले पनि उचित श्रम ज्याला र श्रम सम्मान पाउने वीरगन्ज महानगरपालिकाका प्रमुख राजेश मान सिंहले बताए।
स्व. गोल्छाको जन्म जयन्तिको उपलक्ष्यमा हिप्को सुपरबिल्डमा रक्तदान कार्यक्रम समेत आयोजना गरिएको थियो।
