काठमाडौँ। अस्ट्रेलियाको मेलबर्नस्थित नेपाली समुदायले खोलेको फुटबल क्लब यती एफसीको अध्यक्षमा कर्ण राना निर्विरोध चयन भएका छन्।
मेलबर्नस्थित काठमाडौँ ब्यान्क्वोटमा आइतबार भएको निर्वाचनबाट नयाँ कार्यसमितिको नेतृत्वमा राना आएका हुन्। क्लबको संस्थापममध्येका एक रानाले अब आगामी दुई वर्ष क्लबको नेतृत्व हाक्ने छन्।
क्लबको उपाध्यक्षमा सज्जन शर्मा, अनमिका राई गुरुङ, कोषाध्यक्षमा विपष्ना लामा, सचिवमा रुक्शन राई र उपसचिवमा भरत राना चयन भए। यस्तै, सदस्यहरूमा इन्द्र गुरुङ, विशन गुरुङ, सुरुची श्रेष्ठ, लक्ष्मी गुरुङ र मोनिका महर्जन चयन हुँदा राज शर्मा आईपीपी र बम गुरुङ बोर्ड अध्यक्ष चुनिए।
अस्ट्रेलियाको मेलबर्नमा अवस्थित फुटबल र सामाजिक कार्यमा काम गर्दै आइरहेको यती एफसी हाल सामुदायिक फुटबल ‘सन्डे फुटबल’ खेलिरहेको छ। सन् २००१ मा स्थापना भएको यती एफसीसँग सन् २०१५ मा अस्ट्रेलियाको घरेलु फुटबल संरचनाको पहिलो खुड्किलो मानिने ‘स्टेट फाइभ लिग’ खेलिसकेको छ।
अस्ट्रेलियाको लिग संरचनामा प्रवेश गर्न प्रयासरत यती एफसीले नेपाली राष्ट्रिय फुटबल टोलीबाट खेलिसकेका अन्तराष्ट्रिय खेलाडी तथा नेपालको सहिद स्मारक ‘ए’ डिभिजन लिग खेलिसकेका खेलाडीहरूलाई अनुबन्ध गर्दै फुटबललाई अगाडि बढाइरहेको छ।
