एमालेद्वारा राष्ट्रिय सभा बैठक अवरुद्ध

काठमाडौँ। प्रमुख प्रतिपक्षी दल नेकपा एमालेले राष्ट्रिय सभाको आइतबारको बैठक अवरुद्ध गरेको छ। प्रधानमन्त्री पुष्पकमल दाहालले दिएको अभिव्यक्तिलाई लिएर एमालेले आज पनि राष्ट्रिय सभा बैठक अवरुद्ध गरेको हो।

राष्ट्रिय सभाको आइतबारको बैठक साढे १० बजेपछि सुरु भएको थियो। राष्ट्रिय सभा अध्यक्ष गणेशप्रसाद तिमिल्सिनाले राष्ट्रिय सभाको अवरोध हटाउनका लागि राष्ट्रिय सभामा रहेका दलका सचेतकहरूसँग छलफल गरेका थिए। तर, सहमति भने भएन।

एमाले सांसद भगवती न्यौपानेले प्रधानमन्त्रीले राजीनामा दिनुको विलक्प नभएको भन्दै राजीनामा नदिएसम्म संसद् चल्न नदिने बताइन्।

अवरोधसँगै राष्ट्रिय सभा अध्यक्ष तिमिल्सिनाले भोलि सोमबार बिहान ११ बजेर १ मिनेटसम्मका लागि बैठक स्थगित गरेका हुन्।