एजेन्सी । लामो समयदेखि चलिरहेको रुस र युक्रेन बीचको युद्ध झन् भयानक बन्दै गइरहेको छ । रुसमा वाग्नर समूहको विद्रोहको चर्चा टुङ्गिएको थिएन कि रुसले फेरि युक्रेनमा ठूलो हमला गरेको मिडिया रिपोर्टमा उल्लेख छ ।
मङ्गलबार साँझ पूर्वी युक्रेनको क्रामाटोर्स्कको हलचल भएको डाउनटाउन क्षेत्रमा रुसी मिसाइल प्रहार भएको मिडिया रिपोर्टमा उल्लेख छ ।
आक्रमणमा परी एक बालकसहित कम्तीमा ४ जनाको मृत्यु भएका छन् भने कैयौँ घाइते भएका छन् ।
मृतक र घाइतेको थप विवरण आउन बाँकी छ ।
डोनेट्स्क क्षेत्रका सैन्य प्रशासन प्रमुख पाभ्लो किरिलेन्कोका अनुसार आक्रमणहरू साँझ ७ः३० बजे भएको थियो।
रुसले मंगलबार युक्रेनका दुई सहरमा आक्रमण गरेको थियो । एक क्रेमेन्चुक र अर्को, क्रामटोर्स्क। यी दुवै शहरमा मिसाइल हमला भएको बताइएको छ।
क्रामाटोर्स्कको केन्द्रमा रहेको व्यस्त स्थानमा भएको मिसाइल आक्रमणमा ४ जनाको मृत्यु हुनुका साथै ४२ जनाभन्दा बढी घाइते भएका हुन् ।
रुसले सहरमा दुईवटा एस–३०० मिसाइल प्रहार गरेको बताइएको छ।
युक्रेनी आपतकालीन सेवाले टेलिग्राममा उक्त आक्रमणमा ४२ जना घाइते भएको जानकारी दिएको हो ।
