निगमका विमान चालक आन्दोलनमा उत्रिएपछि नियमति उडान प्रभावित

काठमाडौं । नेपाल वायुसेवा निगमका विमान चालक आन्दोलनमा उत्रिएपछि नियमति उडान प्रभावित भएको छ । निगमका विमान चालकहरू सेवा सुविधा वृद्धिको माग गर्दै हड्तालमा उत्रिएपछि आइतबार भारतको मुम्बई र युनाइटेड अरब इमिरेट्स (यूएई) का उडान तोकिएको समयमै हुन नसक्दा सयौं यात्रु अलपत्र परेका छन् ।

चालकहरु आन्दोलनमा उत्रिएका कारण उडान निर्धारित समयमा हुन नसकेको निगमले जनाएको छ । निगमले चालकको माग सम्बोधनका लागि प्रयास गरिरहेको पनि जनाएको छ । निगमले पर्यटन मन्त्रालय लगायत सम्बन्धिन निकायसँग यसबारेमा पटक—पटक छलफल भएको र माग सम्बोधनका लागि प्रयास भइरहेको पनि जानकारी गराएको छ ।

माग सम्बोधनका लागि निगम गम्भीरतापूर्वक लागेकाले कुनै पनि उडान प्रभावित नगर्न विमान चालकहरुलाई निगमले आग्रह गरेको छ । अत्यावश्यक सेवा र वस्तुमा बन्दहड्ताल गर्न नपाइने कानुनी व्यवस्था भए पनि त्यसलाई उल्लंघन गर्दै विमान चालकहरु आमहड्तालमा उत्रिँदा निगमका उडानहरु प्रभावित भएका छन् । निगमको उडानमा पर्न गएको असरले आर्थिक नोक्सानी मात्र नभएर साख र इज्जतमा समेत नकरात्मक प्रभाव परेको निगमले विज्ञप्ति मार्फत् जनाएको छ ।