काठमाडौं । राष्ट्रिय स्वतन्त्र पार्टी (रास्वपा)का उपसभापति तथा सांसद स्वर्णिम वाग्लेले रास्वपा सरकारमा आए स्वतन्त्र न्यायिक आयोग बनाएर भ्रष्टाचारको निष्पक्ष छानबिन गरिने बताएका छन् ।
सहकारी ठगि प्रकरणमा पक्राउ परेका रवि लामिछानेको रिहाको माग गर्दै बालुवाटारमा भएको प्रदर्शनमा बोल्दै उनले निष्पक्ष छानबिन समितिमा आनन्द मोहन भट्टराई‚ ईश्वर खतिवडा जस्ता न्यायाधीशहरूलाई सहभागी गराउने बताएका हुन् ।
‘धनराज गुरूङ र ऋषिकेश पोखरेललाई उन्मुक्ति दिने । जीबी राईको सल्लाहकार राष्ट्रपतिका सल्लाहकार छन्’, उनले भने, ‘उहाँहरूलाई उन्मुक्ति दिने रविलाई भने हिरासतमा राख्ने ठिक छैन ।’
रविलाई पक्राउ गर्नु राजनीतिक प्रतिशोध भएको बताउँदै उनले अवसर पाए सहकारी बचतकर्ताको रकम फिर्ता गर्ने पनि उल्लेख गरे ।
उनले सरकार भने दल फुटाउने विधेयक ल्याएर साना दल फुटाएर रवि लामिछानेलाई सिध्याउने खेलमा लागेको आरोप लगाए ।
वाग्लेले सरकार आफूहरूलाई थर्काउने धम्काउने र गलाउने रणनीतिमा लागेको भन्दै विरोध समेत गरे ।
