एजेन्सी । फिलिपिन्समा उष्णकटिबन्धीय आँधी ‘ट्रामी’का कारण मृत्यु हुनेको सङ्ख्या १ सय पुगेको उद्धारकर्मीले बताएका छन् ।
आँधी पछि आत्तिएर एउटा तालमा हाम फालेका दर्जनौँ मानिस अझै हराइरहेका छन् भने उनीहरूको खोजी भइरहेको छ । गत अक्टोबर २४ मा फिलिपिन्समा आएको ‘ट्रामी’ यस वर्षको सबै भन्दा घातक आँधी मध्ये एक थियो ।
राष्ट्रिय विपद निकायका अनुसार भूकम्पका कारण पाँच लाख भन्दा बढी मानिस आफ्नो घर छाड्न बाध्य भएका छन् भने कम्तीमा ३६ जना हराइरहेका छन् । सबैभन्दा बढी प्रभावित बिकोल क्षेत्रमा ३८ जनाको डुबेर मृत्यु भएको छ ।
बिकोलका क्षेत्रीय प्रहरी निर्देशक आन्द्रे डिजोनले एएफपी सँग भने, “हामीलाई अझै पनि धेरै फोन आइरहेका छन् र हामी सके सम्म धेरै मानिसहरूलाई बचाउने प्रयास गरिरहेका छौं।” “आशा छ, त्यहाँ थप मृत्यु हुने छैन,” उनले भने ।
डिजोनले यस क्षेत्रको क्यामारिन सुर प्रान्तका ‘धेरै बासिन्दाहरू’ अझै पनि आफ्नो घरको छत र माथिल्लो तलामा फसेको बताए । मनिलाको दक्षिणमा पर्ने बाटाङ्गासमा मृत्यु हुनेको सङ्ख्या ५५ पुगेको प्रान्तीय प्रहरी प्रमुख ज्याकिन्टो मालिनाओले एएफपीलाई जानकारी दिए ।
क्याभिट प्रान्तमा डुबेर दुई जनाको मृत्यु भएको बताइएको छ । एएफपीको आधिकारिक प्रहरी र विपद निकाय स्रोतका अनुसार अन्य प्रान्तमा थप पाँच जनाको शव फेला परे पछि मृतकको सङ्ख्या १०० पुगेको छ ।
नागरिक सुरक्षा कार्यालयका एडगर पोसाडासले एएफपी सँग भने, “आगामी दिनमा अझै धेरै मानिसको मृत्यु भएको जानकारी आउने सम्भावना छ किन भने उद्धारकर्ताहरू पहिले भन्दा फरक स्थानमा उद्धारका लागि पुगेका छन् । प्रहरी, तटरक्षक र मरिन डाइभिङ टोलीले आइतबार पनि बाटाङ्गासको तालमा हामफालेका भनिएका सात परिवारको खोजी गरिरहेका छन् ।
प्रान्तीय प्रहरी प्रमुख मालिनाओले भने, “पहाडको पानीले बालेटे शहरमा रहेको उनीहरूको घरमा पहिरो र बाढी ल्याए पछि उनीहरूको घर भत्किने डरमा आत्तिएर तालमा हाम फालेका थिए । बटाङ्गासमा अधिकांश को मृत्यु वर्षाका कारण आएको पहिरोका कारण भएको बताइएको छ ।
माटो, ढुङ्गा र ढलेका रूखको थुप्रो बाट २० जना भन्दा बढीको शव निकालिएको छ भने कम्तीमा २० जना अझै हराइरहेको प्रहरीले जनाएको छ ।मालिनाओले भने, “सबै शव नभेटिए सम्म हामी खोजी जारी राख्नेछौं ।”
उत्तरी फिलिपिन्सको विभिन्न भागमा आएको बाढीका कारण करिब पाँच लाख ६० हजार मानिस विस्थापित भएको राष्ट्रिय विपद् निकायले जनाएको छ ।
प्रत्येक वर्ष करिब २० वटा ठूला आँधीबेहरीले फिलिपिन्स र यसको वरपरका घर र पूर्वाधारमा क्षति पुर्याउने गरेको छ भने दर्जनौं मानिसको ज्यान लिने गरेको छ ।
एशिया–प्रशान्त क्षेत्रका आँधीबेहरीहरू समुद्र तटको नजिक बढ्दै गएको र जलवायु परिवर्तनका कारण जमिनमा अझ तीव्र र लामो समय सम्म टिक्ने आँधी आउने हालै गरिएको एक अध्ययनले देखाएको छ ।
