काठमाडौँ । संयुक्त राष्ट्रसंघको ७९ औं महासभामा भाग लिन अमेरिका पुगेका प्रधानमन्त्री केपी शर्मा ओली र संयुक्त राष्ट्रसंघका महासचिव एन्टोनियो गुटेरेसबीच भेटवार्ता भएको छ ।
महासभाका क्रममा न्यूयोर्कमा रहनु भएका प्रधानमन्त्री ओलीले संयुक्त राष्ट्रसंघका महासचिव गुटेरेससँग औपचारिक भेटवार्ता गरेका हुन् । सोही अवसरमा प्रधानमन्त्री ओलीले जलवायु परिवर्तनले विश्वभर पारेको असर र त्यसको न्युनिकरणका लागि ठोस पहल चाल्न गुटरेसलाई आग्रह गरे ।
यसैबीच प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीबीच भेटवार्ता हुने भएको छ । संयुक्त राष्ट्र संघको महासभामाका क्रममा प्रधानमन्त्री ओली र भारतीय समकक्षी मोदीबीच सोमबार बिहान साइडलाइन भेटवार्ताको समय तय गरिएको छ ।
मोदीसंगको भेटमा भेटमा इपीजीको प्रतिवेदन, सीमा समस्या लगायत विषयमा कुराकानी हुने बताइएको छ । गत असार ३० गते प्रधानमन्त्री नियुक्त भएपछि ओलीले दिएको ईपीजी र सीमा सम्बन्धका अभिव्यक्तिबारे भारत रुष्ट रहेकै बेला यी दुई नेताबीच भेटवार्ता हुन लागेको हो । भेटमा नेपाल र भारतबीचको सम्बन्ध, दुई देशबीचको उच्चस्तरीय भ्रमण लगायत विषयमा पनि कुराकानी हुने परराष्ट्र मन्त्रालयले जनाएको छ ।
त्यसअघि प्रधानमन्त्री ओलीले संयुक्त राष्ट्रसंघको महासभामा जीवाष्म इन्धनमुक्त संसदीय सञ्जाल (पार्लियामेन्टेरियन्स फर फोसिल फ्युल फ्रि) को कार्यक्रममा मुख्य वक्ताका रूपमा सम्बोधन गरेका थिए ।
