काठमाडौँ । गजलकार खिम केसीको हालै प्रकाशित गजल संग्रह ‘लोरी’को काठमाडौँमा परिचर्चा भएको छ ।
शनिबार गजलकार ज्ञानुवाकर पौडेल, शीतल कादम्बिनीलगायत गजल क्षेत्रका अग्रजहरूको प्रमुख उपस्थितिमा केसीको ‘लोरी’को परिचर्चा गरिएको हो ।
काठमाडौँको कालिकास्थानस्थित सर्वनाम थिएटरमा गोधुली साहित्य प्रतिष्ठानको आयोजनामा भएको उक्त कार्यक्रममा केसीका गजल गायन एवम् वाचन पनि गरिएको थियो ।
लामो समयदेखि प्रदेशी भूमिमा रहेर कलम चलाइरहेका केसीका गजलहरूमा देश प्रेम, युवाको भूमिका, प्रदेशीका पीडा, गाउँघरका सामान्य दैनिकी र आमाप्रतिको प्रेम एवम् भावना जोडिएको कार्यक्रमका प्रमुख वक्ता गजलकार ज्ञानुवाकर पौडेलले टिप्पणी गरेका गरेका थिए ।
यस्तै, गजलकार शीतल कादम्बिनीले केसीका गजलमा सरल भाषाशैली र निकै मार्मिक भाव पाएको टिप्पणी गरिन् । उनले केसीका गजल वाचनभन्दा पनि गायनमा झनै राम्रो रहेको बताइन् ।
गत असार २४ गते दाङमा विमोचन भएको ‘लोरी’ बिक्रीबाट आउने रकम र त्यसमा आफूले केही रकम थप गरेर आमाबुवाको नाममा चार लाख बराबरको अक्षयकोष राप्ति साहित्य परिषद्को नाममा स्थापना गर्ने केसीको घोषणा छ ।
दाङ घर भई हाल अमेरिकालाई कर्मथलो बनाइरेका केसीले लामो समयदेखि नियात्रा, गजल, गीत र कवितामा कलम चलाउँदै आएका छन् ।
