काठमाडौँ । चलचित्र ‘पूर्ण बहादुरको सारङ्गी’मा अलिशा बास्तोलाको प्रवेश भएको छ । दोस्रो चरणको छायांकन सुरु गरेको निर्माण पक्षले अलिशालाई अनुबन्ध गरेको हो । अलिशाको यो डेब्यु फिचर फिल्म हो ।
जेठ २४ गतेबाट छायाकंन सुरु गरेर केही दिन अघि ओखलढुंगाको रुम्जाटार क्षेत्र आसपासमा ३६ दिन लगाएर पहिलो चरणको छायांकन सकिएको थियो । दोस्रो चरणको छायांकन भक्तपुरको दुवाकोटबाट सुरु गरिएको छ ।
‘पूर्ण बहादुरको सारङ्गी’मा विजय बराल, प्रकाश सपूत, मुकुन भुसाल, अञ्जना बराइलीको मुख्य भूमिका रहेको छ । चलचित्रमा विनोद न्यौपाने, भोलाराज सापकोटा, बुद्धि तामाङ, माओत्से गुरुङ र देशभक्त खनाललगायत कलाकारको पनि अभिनय रहनेछ ।
सोसल–ड्रामा चलचित्रले गन्धर्व परिवारको कथा भन्नेछ । सरोज पौडेलले निर्देशन गरेको चलचित्रको कथा पनि उनी स्वयंले लेखेका हुन् ।
