बजेटले अर्थतन्त्रको समस्यालाई सामान्यीकरण गरेको छः विष्णु पौडेल

काठमाडौँ। नेकपा एमालेका सांसद विष्णु पौडेलले बजेटले अर्थतन्त्रको समस्यालाई सामान्यीकरण गरेको आरोप लगाएका छन्। आइतबार प्रतिनिधि सभामा बजेटमाथिको छलफलमा बोल्दै निवर्तमान अर्थमन्त्री पौडेलले प्रस्तुत बजेटले मन्दीको अवस्थामा पुगेको अर्थतन्त्रको समस्यालाई सामान्यीकरण गरेको बताएका हुन्।

सांसद पौडेलले भने, ‘सरकारले लिएको पहल कदमीले अर्थतन्त्रमा सकरात्मक संकेत देखिन थालेको भ्रम छर्ने काम गरेको छ।’

पौडेलले अर्थमन्त्रीले खर्च कटौतीको नारा ल्याएर राष्ट्रपति, प्रधानमन्त्री, जनप्रतिनिधिको भत्ता कटौती किन गर्न नसकेको भन्दै प्रश्न गरे। आर्थिक दायित्व खासै नपर्ने संस्थाहरु खारेज गर्ने निर्णय भएपनि खर्च घटाउन भत्ता खारेज गर्ने काम गर्न नसकेको उनको भनाई छ।

उनले कम किलोवाट क्षमताका विद्युतीय सवारी साधनको कर बढाएको किन भन्दै प्रश्न गरे। पौडेलले विद्युतीय सवारी साधनको करको हर हेरफेर गर्ने प्रस्तावको औचित्य पुष्टि गर्न चुनौती दिए।