काठमाडौँ । प्रतिनिधि सभाको बैठक सुरु भएको छ ।
आजको बैठकमा प्रधानमन्त्री पुष्पकमल दाहाल प्रचण्डले विश्वासको मत लिँदै छन् ।
नेकपा एमालेले सरकारलाई दिएको समर्थन फिर्ता लिएपछि उनले नेपालको सविंधानको धारा १०० को उपधारा (२) अनुसार विश्वासको मत लिन लागेका हुन् ।
संसद्का दुई ठूला दल नेपाली कांग्रेस र एमालेबीच केपी शर्मा ओलीको नेतृत्वमा नयाँ सरकार गठन गर्ने समझदारी भएअनुसार एमालेले मन्त्रीहरुलाई फिर्ता बोलाएर समर्थन फिर्ता लिएको थियो ।
२७५ सदस्यीय प्रतिनिधिसभामा बहुमतका लागि १३८ मत चाहिन्छ । तर अहिले प्रधानमन्त्री दाहालसँग माओवादीको ३२, रास्वपाको २१ र एकीकृत समाजवादीको १० गरेर जम्मा ६३ मत मात्र पुग्दछ । यस अंकगणित अनुसार प्रधानमन्त्री दाहालले विश्वासको मत नपाउने निश्चित छ । प्रधानमन्त्री दाहाललाई आज विश्वासको मत नदिनका लागि काँग्रेस, एमाले लगायतका दलहरुले आफ्ना सांसदहरुलाई ह्वीप जारी गरेका छन् ।
